གཙོ་ངོས།>> དམངས་སྲོལ།>>བཟའ་ཆས།

ཨོ་རྒྱན་དོན་གྲུབ། རྩོམ་སྒྲིག་པ།དབང་ཆེན།ཡོང་ཁུངས།བོད་ལྗོངས་རིག་གནས་དྲ་བ། སྤེལ་དུས། ༢༠༡༤ལོའི་ཟླ་བ་༡༢ཚེས་༡༡ཉིན།

༄༅། །ཁམས་མི་ཉག་འདྲ་པའི་ཕག་རྙིང་།

        སྤྱིར་ཡུལ་གྲུ་རེ་ལ་རང་རང་གི་ཡུལ་ཁམས་ནས་དར་བའི་ཐུན་མིན་གྱི་ཟས་རིགས་ཕུན་སུམ་ཚོགས་པོ་རེ་ཡོད་ལ། དེ་ལས་ཆེས་བཤད་རིན་དུ་ཡོད་པ་ནི་ཁམས་མི་ཉག་འདྲ་པ་ཡུལ་གྱི་ཕག་རྙིང་དེ་རེད། ལར་ཕག་རྙིང་ཟེར་དུས་ཕག་ཤ་རྙིང་བར་གོ་དགོས་ལ། ཕག་རྙིང་གི་ཟས་རིགས་འདིའི་གཡོ་སྦྱོར་གྱི་ལས་ཀ་འདི་ཡུལ་འདྲ་པར་ནས་ད་ལྟའི་བར་དུ་ལོ་བརྒྱ་ཕྲག་བཞི་ཙམ་གྱི་ལོ་རྒྱུས་འཆད་རྒྱུ་འདུག་ཅིང་། ཡུལ་འདྲ་པའི་ཐུན་མོང་མིན་པའི་ཟས་རིགས་མཆོག་ཏུ་གྱུར་པ་ཞིག་ཡིན་པ་མ་ཟད། དེང་སྐབས་རྒྱལ་ཕྱི་ནང་གི་ཟས་རིགས་ཁྲོད་དུའང་ཡུལ་འདྲ་པའི་ཕག་རྙིང་གི་ཟས་རིགས་ལ་ཧ་ཅང་བཅུད་ལྡན་དང་ངོ་མཚར་དུ་འཛིན་བཞིན་ཡོད།
        འདྲ་བའི་ཕག་རྙིང་དེ་ཇི་ལྟར་གཡོ་སྦྱོར་བྱེད་དགོས་པའི་སྐོར།
        གཅིག ཡུལ་འདྲ་པའི་ཕག་རྙིང་དེ་ཇི་ལྟར་གཡོ་སྦྱོར་བྱེད་དགོས་ཤེ་ན། དེ་ནི་ཕག་ཅིག༼འདྲ་པ་རང་ས་ནས་ཡིན་པའི་བོད་ཕག་ནག་པོ་མ་གཏོགས་དེང་སྐབས་ཀྱི་རྒྱ་ཕག་དཀར་པོ་རིགས་ཀྱིས་འདྲ་པའི་ཕག་རྙིང་ལས་བྱེད་ཀྱི་རྒྱུ་བྱ་མི་རུང་བ་ཡིན། དེ་ནི་བོད་ཕག་ནག་པོའི་པགས་པ་མཐུག་ལ་རྒྱ་ཕག་དཀར་པོའི་པགས་པ་སྲབ་པས་ཡིན། ༽རང་ཡུལ་གྱི་ལྷད་མ་འདྲེས་པའི་ཞོག་ཁོག་དང་། ཉུང་མ། མ་རྨོས་ལོ་ཏོག།ནས་སོགས་ཀྱིས་ལོ་བཞི་ལྔ་ཙམ་ལ་གསོས་ཏེ་ཚོན་པོ་གྱུར་ནས་ཆེ་རུ་སོང་ཚེ་བཤའ་པ་ཡིན། བཤས་ཚར་རྗེས་ཕག་སྤུ་གཙང་མ་བཞར་ནས་ཁོག་པའི་ཁ་ཕྱེས། ནང་ཁྲོལ་ཡོངས་རྫོགས་ཕྱིར་བླངས་རྗེས།ཕག་གི་ཁོག་པའི་ནང་དུ་ཆུ་ཚ་མོས་གཙང་མར་བཀྲུས། དེ་ནས་ཁོག་པའི་ནང་ཁྲོལ་གྱི་ཤུལ་ལམ་ཚབ་ཏུ་སྐྱུར་བོ་སྐམ་པོ་འམ་ཉུང་མའི་ལོ་མ་སྐམ་པོ་གང་གང་བ་ཞིག་བརྫངས་རྗེས་ཕག་གི་ཁོག་པའི་ཁ་ཕྱིར་བཟོ་དྲུབ་བྱས་པ་དང་། ཤ་དང་པགས་པ་གཉིས་ཀྱི་བར་དུ་དབུག་བརྒྱབ་སྟེ་ལྒང་རིལ་དུ་བཏང་། ཁ་མིག་སྣ་སོགས་བུ་ག་ཡོངས་རྫོགས་སུ་འདམ་བག་གིས་བརྫངས།༼དེ་ནི་གཙོ་བོ་འདྲ་ཡུལ་དུ་ས་དྲོད་ས་ཡིན་པས་འབུ་སོགས་ཀྱི་གནོད་པར་དོགས་པ་ཡིན།༽དེ་ནས་ཕག་གི་རྐང་ལག་བཞི་པོར་དབྱུག་པས་རྒྱུག་ཤིང་བཏང་སྟེ་ཐག་པས་དམ་པོར་བཀྱིགས་ཤིང་ཕག་གི་རྐང་ལག་བཞི་པོ་ཁ་གནམ་ལ་བསྐོར་ཏེ་ཕག་ཁོག་ཐབ་ཀའི་ཐོག་ནས་གནམ་ལ་འགེལ་བ་རེད། དེ་ནི་ཕག་རྙིང་ཞིག་ལས་རྒྱུའི་གོ་རིམ་ཐོག་མ་དེ་རེད།
        གཉིས། དེ་ནས་ཕག་ཁོག་ཐབ་ཀའི་ཐོག་ནས་དབྱར་དགུན་སྟོན་དཔྱིད་ཀྱི་དུས་ཚིགས་བཞི་པོ་རེས་མོ་ཀྱི་སྒོ་ནས་ལོ་རེ་རེ་བཞིན་སྟེང་ལ་དུ་ཁུང་ནས་ལྡིང་བའི་རླུང་དང་། འོག་ཏུ་ཐབ་ནས་འབར་བའི་མེ་དྲོད་དང་དུ་བས་བདུག་པའི་དྲོད་སོགས་དང་ཡུན་རིང་བོ་སྟེ་རབ་ན་ལོ་ལྔ་བཅུ།འབྲིང་ན་ལོ་སུམ་ཅུ། ཐ་མའང་ལོ་ཉི་ཤུ་ཡར་མར་ལ་༼ལོ་ཇི་ལྟར་མང་པོར་སོང་ན་དེལྟར་རིན་ཐང་ཆེ་བར་བརྩི་བཞིན་ཡོད།༽འགྲོགས་ཤིང་བཤིབས་ནས་ད་གཟོད་ཕག་རྙིང་ཞེས་བཅུད་དང་ལྡན་ལ། འཚོ་བའི་ཟས་ཕུན་སུམ་ཚོགས་པ་འདི་གྲུབ་པ་རེད།
        ཕག་རྙིང་གི་ཟས་རིགས་ལ་བརྟེན་ཐབས།
        ཕག་རྙིང་གི་ཟས་རིགས་འདི་གང་བྱུང་དུ་བཟའ་རྒྱུ་ཞིག་དང་མི་སུ་ཡིན་གྱིས་བཟའ་ཆོག་པ་ཞིག་གཏན་ནས་མིན་ལ། དེས་ན་ཕག་རྙིང་གི་ཟས་རིགས་འདི་སུ་ཞིག་གི་དུས་གང་གི་སྐབས་སུ་བཟའ་ཆོག་པ་རེད་ཅེ་ན། དེ་ནི་གཙོ་བོ་གཉེན་སྟོན་གྱི་སྐབས་དང་ཁྱིམ་མི་ཚེ་ཡིས་དུས་བྱས་པའི་སྐབས་ཀྱི་གཤིན་ཆོས་སོགས་སུ་བཟའ་ཆོག་པ་ཞིག་ཏུ་གྱུར་འདུག ཡུལ་འདྲ་པར་མཚོན་ན་དུས་སྐབས་འདི་འདྲ་ལ་ཕག་རྙིང་གི་ཟས་རིགས་དེ་མེད་དུ་མི་རུང་བ་ཞིག་ཏུ་གྱུར་འདུག ཁྱིམ་མི་ལ་ཚེ་ཡིས་དུས་བྱས་ཚེ་ཡུལ་དེ་གའི་དགོན་པའི་བླ་སེར་གདན་དྲངས་ནས་གཤིན་ཆོས་འཚོགས་པའི་སྲོལ་དེ་ནི་བོད་ཁམས་ཀྱི་ས་ཆ་གཞན་དང་གཅིག་མཚུངས་ཡིན་ནའང་། ཆེས་ཡ་མཚན་པ་ཞིག་ལ་དགོན་པའི་བླ་སེར་དག་ལ་འབུལ་བའི་རྒྱུ་ནོར་དེ་སྒོར་མོ་དང་དངོས་པོ་གཞན་དག་མིན་པར། ཕག་རྙིང་གི་ཤ་དེ་གྱུར་འདུགཕག་རྙིང་གི་སོག་པ་གཅིག་དགོན་པའི་བླ་མ་ལ་ཕུལ་སྲིད་ལ། སྨད་གཟུགས་ཀྱི་དཔྱི་འགོ་གྲུ་བཞི་ཞིག་དགོན་པ་དེའི་དགེ་སྐོས་ལ་ཕུལ་སྲིད། དེ་མིན་ཕག་ཁོག་ཧྲིལ་པོ་གྲུ་བཞི་གྲུ་བཞི་བྱས་ཏེ་དུམ་བུ་ཆུང་ཆུང་བཅད་དེ་གྲྭ་པ་ཚོར་ཕུལ་སྲིད་པ་རེད། ཡུལ་རྒྱང་རིང་ནས་ཁྱིམ་དུ་ཡོང་བའི་མགྲོན་པོ་རྩ་ཆེན་དང་ནང་མི་རྩ་ཆེན་རང་ཁྱིམ་དུ་འབྱོར་ཚེ་ཕག་ཤ་འདི་དྲངས་སྲིད་དེ། དེ་ནི་མི་དེ་ལ་ཆེས་མཐོང་ཆེན་དང་བརྩི་འཇོག་གི་གུས་སྲོལ་གྱི་རྣམ་པ་མཚོན་བྱེད་ཅིག་ཏུ་བརྩི་བཞིན་ཡོད་པ་རེད། རང་གི་ཁྱིམ་མི་ལྷན་འཛོམས་ཀྱི་སྐབས་སུ་ནུབ་མོར་ཐུག་པ་རེ་སྐོལ་སྲིད་ལ་ཐུག་པའི་ནང་དུ་ཕག་ཤ་མཐེབ་མགོ་འདྲ་ཞིག་འཕེན་ན་དེའི་བཅུད་ཀྱིས་ཐུག་པ་བ་མ་གང་དེ་ལ་བྲོ་བ་ཕུན་སུམ་ཚོགས་པ་རེ་འབྱུང་སྲིད་པ་རེད།

39.7K

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1