གཙོ་ངོས།>> ཞིབ་འཇུག>>ལོ་རྒྱུས།

རྩོམ་པ་པོ། ཨོ་རྒྱན་གྱིས་འཚོལ་བསྡུ་བྱས། རྩོམ་སྒྲིག་པ།དབང་ཆེན།ཡོང་ཁུངས།ཁམས་པའི་རིག་གནས་དྲ་བ། སྤེལ་དུས། ༢༠༢༡ལོའི་ཟླ་བ་༠༧ཚེས་༡༢ཉིན།

༄༅།།གུ་གེ་དང་ཞང་ཞུང་གཉིས་དོན་གཅིག་པ་ཡིན་ནམ།

     གུ་གེ་ཞེས་པ་ནི་གུ་གེ་རྒྱལ་རབས་ཆགས་ཡུལ་གྱི་ས་གནས་ཤིག་ཡིན་པའི་ཐོག། རྒྱལ་ཡོངས་ཀྱི་རིག་དངོས་སྲུང་སྐྱོབ་སྡེ་ཚན་ཁོངས་སུ་གཏོགས་པ་དང༌། མངའ་རིས་ས་ཁུལ་གྱི་ཧ་ཅང་གལ་ཆེའི་གནའ་རབས་འཛུགས་སྐྲུན་གྱི་ཆགས་ཤུལ་གྲས་ཤིག་ཀྱང་ཡིན། དེང་སང་བོད་རང་སྐྱོང་ལྗོངས་ཀྱི་རྩ་མདའ་རྫོང་ཁོངས་སུ་ཡོད། གནའ་རབས་ཀྱི་མིང་རྙིང་པར་ཞང་ཞུང་ཟེར་ཞིང༌། བོད་ཀྱི་བཙན་པོའི་རྒྱལ་རབས་མ་ཚུགས་གོང་གི་ཞང་ཞུང་རྒྱལ་རབས་ཀྱང་ས་གནས་འདིར་ཆགས་པ་ཡིན། རྒྱ་ཡིག་གི་ལོ་རྒྱུས་ཡིག་ཆ་རྙིང་པའི་ནང་ཡང་ཐུང(羊同)ཞེས་འཁོད། དེ་སྐོར་གྱི་ཚིག་འགྲེལ་གཤམ་གསལ་ཞང་ཞུང་ཞེས་པ་དེར་གཟིགས་དགོས། གུ་གེ་ནི་མངའ་རིས་ཁུལ་གྱི་ལྷོ་ནུབ་ཕྱོགས་སུ་ཡོད་ཅིང༌། ནུབ་དང༌། ལྷོ། བྱང་ངོས་བཅས་རྒྱ་གར་དང་ཀསྨི་ར་དང་ས་འབྲེལ་ཡིན་པ་དང༌། ཤར་དང་ལྷོ་ངོས་བོད་རང་སྐྱོང་ལྗོངས་ཀྱི་སྒར་རྫོང་དང༌། སྤུ་ཧྲེངས་རྫོང་དང་འབྲེལ་ཡོད། གླང་ཆེན་ཁ་འབབ་ཆུ་བོའི་དཀྱིལ་རྒྱུད་དུ་གནས་ཤིང༌། རྫོང་ཡོངས་ཀྱི་ས་ཆའི་རྒྱ་ཁྱོན་སྤྱི་ལེ་གྲུ་བཞི་མ༢༢༥༠༠དང༌། མི་འབོར༤༥༤༩(༡༩༨༣ལོ)ཡོད་པའི་ནང་མང་ཆེ་བ་བོད་རིགས་ཡིན་ཅིང༌། ཞིང་ལས་མི་འབོར་བསྡོམས་གྲངས༢༩༠༤དང༌། ས་ཞིང་གི་རྒྱ་ཁྱོན་མུའུ༡༡༨༠༠ཙམ་ཡོད་པ་དེས་མི་གྲངས་བསྡོམས་འབོར་གྱི་བརྒྱ་ཆ༦༣དང་གྲངས་ཆུང༨ཟིན། འབྲོག་ལས་མི་འབོར༧༢༧ཙམ་ཡོད་པ་དེས་མི་གྲངས་བསྡོམས་འབོར་སྤྱིའི་བརྒྱ་ཆ༡༦ཟིན། ནགས་ཚལ་གྱི་རྒྱ་ཁྱོན་མུའུ༤༠༠ལྷག་ཙམ་ཡོད་པ་དེས་མངའ་རིས་ས་ཁུལ་ཡོངས་ཀྱི་ནགས་ཚལ་རྒྱ་ཁྱོན་སྤྱིའི་བཞི་ཆ་གཅིག་ཟིན། དགོན་པ་གྲངས༧༥ཡོད་པའི་ནང་རྙིང་མའི་དགོན་པ༦། ས་སྐྱའི་དགོན་པ༡༢། བཀའ་བརྒྱུད་དགོན་པ༢༠། དགེ་ལུགས་དགོན་པ༣༥། བོན་པོའི་དགོན་པ༡། ཆོས་ལུགས་ངེས་གཏན་མེད་པའི་དགོན་པ༡བཅས་ཡོད་པ་དང༌། དགོན་པ་གཞན་དག་ལ་གྲྭ་པ་དང་ཨ་ནེ་གྲངས་འབོར་ཇི་ཡོད་དཔྱད་གཞི་མ་རྙེད་ཀྱང༌། དགེ་ལུགས་དགོན་པ་རྣམས་ལ་སྡེ་སྲིད་སངས་རྒྱས་རྒྱ་མཚོའི་སྐབས་གྲྭ་གྲངས༧༢༥ཡོད་པར《བེ་སེར》ལས་གསུངས། དེ་སྔའི་བོད་ས་གནས་སྲིད་གཞུང་སྐབས་རྩ་ཧྲེང་རྫོང་དང༌། མདའ་པ་རྫོང་གཉིས་སུ་དབྱེ་ཡོད་ཀྱང༌། བོད་ལྗོངས་བཅིངས་འགྲོལ་བཏང་རྗེས་རྫོང་གཉིས་ཟླ་སྒྲིལ་བཏང་སྟེ་རྩ་མདའ་རྫོང་ཞེས་རྫོང་རིམ་པའི་སྲིད་འཛིན་ས་ཁུལ་བཙུགས་པ་རེད།

39.7K

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1